Քարաթափում Ձորագյուղում


Մայիսի 2-ին, ժամը 12.30-ին Լոռու մարզի Ձորագյուղից ահազանգ է ստացվել, որ տեղացած անձրեւների հետևանքով տեղի է ունեցել քարաթափում, ինչի պատճառով փակվել է Ձորագետ-Ձորաղբյուր ավտոճանապարհը։
Դեպքի վայր է մեկնել մարզային փրկարարական վարչության օպերատիվ խումբը։
Կազմակերպված համապատասխան միջոցառումների արդյունքում ժամը 15.00-ի դրությամբ ճանապարհի մաքրման աշխատանքներն ավարտվել են, երթեւեկությունը` վերականգնվել։


Մեքենան իջել է ձորը


Մայիսի 2-ին, ժամը 15.07-ին ահազանգ է ստացվել, որ Ստեփանավան-Տաշիր ավտոճանապարհի 8-րդ կմ-ում` Լոռվա կիրճ կոչվող տարածքում, ավտոմեքենան սողալով իջել է ձորը, եւ այն դուրս բերելու համար անհրաժեշտ է փրկարարների օգնությունը։
Դեպքի վայր է մեկնել, Լոռե փրկարարական ջոկատը։
Տեղում պարզվել է, որ, դեռևս չպարզված հանգամանքներում, Թ. Աթոյանին պատկանող, ՎԱԶ-2121 մակնիշի 68 ՍՏ 545 պետհամարանիշի ավտոմեքենան դուրս է եկել ճանապարհի երթևեկելի մասից եւ սողալով իջել ձորը։
Փրկարարների ուժերով ավտոմեքենան դուրս է բերվել երթեւեկելի մաս։


Ժայռից մարդ է ընկել


Մայիսի 2-ին, ժամը 17.50-ին ահազանգ է ստացվել, որ Վայոց ձորի մարզի, Մագիլի քարանձավե կոչվող տարածքում ժայռից մարդ է ընկել, եւ անհրաժեշտ է փրկարարների օգնությունը։
Դեպքի վայր են մեկնել մարզային փրկարարական վարչության փրկարար ջոկատը եւ շտապօգնության մեկ բրիգադ։
Տեղում պարզվել է, որ Երեւանի բնակիչ, 1973 թ. ծնված Հայկ Հարությունյանը փորձել է բարձրանալ քարանձավ, սակայն ոտքը սայթաքել է եւ 5-6 մ բարձրությունից ընկել է ներքեւ։
Տուժածը փրկարարների օգնությամբ` պատգարակով, դուրս է բերվել, եւ շտապօգնության մեքենայով տեղափոխվել Եղեգնաձորի հիվանդանոց։