Ոչ մի ծնող չի կարող երեխային անընդհատ պահել տանը։ Այդպես չի կարելի վարվել, նույնիսկ,  անվտանգության նկատառումներից ելնելով, քանի որ նրան անհրաժեշտ է շփվել հասակակիցների հետ եւ թարմ օդ շնչել։ Ինչպե՞ս հետ պահել երեխային փողոցի բացասական ազդեցությունից, վատ ընկերներից եւ հանցագործներից։

Քանի դեռ նա փոքր է, ծնողները կարող են նրան ձեռքից բռնած տանել բակում զբոսնելու կամ խաղալու, բայց ի՞նչ անել, եթե երեխան, փոքր-ինչ մեծանալով, հրաժարվում է ծնողի խնամակալությունից։ Անկախ նրանից ծնողը երեխայի հետ է, թե հետեւում է նրան պատուհանից, անհրաժեշտ է նախապատրաստել փոքրիկին տնից դուրս սպասվող բոլոր հնարավոր վտանգներին։

Առաջին հերթին երեխային տնից դուրս թողնելիս պետք է ամենայն մանրամասնությամբ քննել նրա հագուստը՝ արդյո՞ք այնտեղ անհարկի ուշադրություն գրավող որեւէ պարագա չկա (օրինակ՝ տարիքին անհամապատասխան թանկարժեք ոսկյա զարդեր, ինչը հիմա, ցավոք, շատ տարածված է մեզանում)։ Կրկին հիշեցնում ենք, որ չարժե տան բանալիները կախել երեխայի պարանոցից կամ տաբատի գոտուց։ Դրանք պետք է պահել հագուստի ծոցագրպանում կամ թողնել վստահելի հարեւաններից որեւէ մեկի մոտ։

Հաճախ հիշեցրեք նրան զգուշության մասին։ Տնից դուրս գալուց առաջ միասին կրկնեք երեխայի եւ ծնողների լրիվ անունները, տան հասցեն եւ հեռախոսահամարը։ Ասացեք, որ եթե որեւէ մեկը փորձի նրան բռնի ուժով տանել կամ ավտոմեքենա նստեցնել, ապա անհրաժեշտ է բղավելով ասել իր անունը, հեռախոսահամարը եւ խնդրել, որ զանգահարեն ծնողներին։

Եթե երեխան բավականաչափ մեծ չէ, եւ դուք վախենում եք նրան միայնակ թողնել, ապա կարող եք հետեւել նրան պատուհանից։ Թույլ մի տվեք, որ նա հեռանա ձեր տեսադաշտից, նույնիսկ, եթե որեւէ կարեւոր ու անհետաձգելի գործ ունեք։ Հիշեք, որ երեխան միշտ էլ ավելի կարեւոր է։ Ծայրահեղ դեպքում կարող եք խնդրել բակում գտնվող հարեւանին որոշ ժամանակ հետեւել ձեր փոքրիկին։

Եթե փոքրիկի կողքին անծանոթ մարդ եք նկատում, ապա որեւէ պատրվակով երեխային կանչեք տուն։ Եթե նա հենց նոր է իջել բակ, ապա կարող եք ինքներդ իջնել նրա մոտ։ Բայց այդ դեպքում աշխատեք նկատողություններով չճնշել նրան (այնտեղ մի գնա, այսինչ բանը մի արա եւ այլն), այլապես երեխայի մեջ կարող է ներքին բողոք առաջանալ, ու նա կանի ձեր ասածի ճիշտ հակառակը։ Որեւէ բան արգելելիս անհրաժեշտ է միշտ պատճառաբանել այն, թե չէ երեխան չի ենթարկվի։

Այս կանոնները հիմնականում ծնողների համար են։ Իսկ ի՞նչ պետք է անի երեխան՝ իր անվտանգությունը պահպանելու համար։

Տան դուռը բացելուց առաջ անհրաժեշտ է դիտանցքից նայելով ստուգել արդյո՞ք մուտքի հարթակում կողմնակի մարդիկ չկան։ Եթե կան, ապա պետք է սպասել մինչեւ նրանք հեռանան կամ դուրս գալ ծնողներից մեկի ուղեկցությամբ։ Դուռն ուշադիր բոլոր փականներով կողպելուց հետո անհրաժեշտ է ստուգել արդյո՞ք այն իսկապես փակ է։ Բանալիները չի կարելի պահել դռան վերեւում կամ գորգի տակ։ Եթե ծնողները տանը չեն, ապա երեխան սենյակի որեւէ երեւացող անկյունում (այնպես,որ ծնողներն անպայման նկատեն) պետք է գրություն թողնի՝ նշելով, թե ուր է գնացել, ում հետ եւ երբ է վերադառնալու։ Գրության մեջ կարելի է նշել նաեւ այն ընկերոջ տան հեռախոսահամարը, ում հետ նա գնացել է զբոսնելու։ Առավել անհանգիստ ծնողներին զգուշացնում ենք, որ այդ հեռախոսահամարով կարելի է զանգահարել միայն արտակարգ դեպքում, օրինակ, եթե երեխան շատ է ուշացել։ Եթե տուն գալուն պես սկսեք զանգահարել նրա բոլոր ծանոթներին, երեխան կդադարի ձեզ վստահել եւ հաջորդ անգամ նման բան չի անի։ Անկախ ամեն ինչից նա պետք է նշված ժամին տանը լինի կամ զանգահարի ծնողներին եւ զգուշացնի, որ ուշանալու է։ Այդ նպատակով երեխայի մոտ կարող եք հեռախոսի քարտ թողնել, քանի որ գումարը նա կարող է ծախսել կամ հնարավոր է, որ չկարողանա ինքնուրույն քարտ գնել։ Գրությունը չի կարելի թողնել դռան վրա, որովհետեւ դա հանցագործների համար ազդանշան կլինի, որ տանը մարդ չկա եւ այն հանգիստ կարելի է կողոպտել։

Հայտնվելով շենքի մուտքում միշտ հիշեք, որ չի կարելի դռնից դուրս վազել. այնտեղ կարող է ավտոմեքենա լինել, որը կշարժվի հենց երեխայի դուրս վազելու պահին կամ նրան կարող է ընդառաջ գնալ ձեռքին որեւէ սուր առարկա (դանակ,  մկրատ, սղոց եւ այլն) ունեցող հարեւանը, որին բախվելով փոքրիկը կարող է լուրջ վնասվածքներ ստանալ։ Այսպիսով, շենքի մուտքից դուրս գալուց առաջ անհրաժեշտ է դուռը հանգիստ բացել, ուշադիր ստուգել արդյո՞ք ճանապարհն ապահով է, մոտակայքում մեքենաներ կամ կողմնակի մարդիկ չկան եւ նոր միայն դուրս գալ փողոց։ Հոգեբաններն ապացուցել են, որ շտապելիս մարդիկ հաճախ չեն նկատում, նույնիսկ, ամենաակնհայտ բաները։ Այնպես որ մի շտապեք ձեզ վտանգի ենթարկել։